تكملة..مش ناوي تخطب بقي يابني عايزه البس فستان..من هنا

-متأكده؟؟
-متقلقش
-لا انتي مش كويسه مالك في ايه
-مفيش حاجه بجد انا مخنوقه بس شويه
-من ايه
-عادي فكك
-لا مالك احكيلي مش احنا اخوات
-اكيد
-يبقي تقوليلي
حاولت أتوه في الكلام وبالفعل قدرت اعمل كده وشويه وقفلت علي اساس هذاكر بس انا مقدرتش افتح الكتاب في اليوم ده
كنت كل ما احاول اعمل اي حاجه بفشل كنت بعيط طول اليوم علي حظي،مشاعري اللي راحت هدر مع شخص مكانش شايفني من ضمن أحلامه
فات يوم ورا الثاني ورا الثالث حاولت اتأقلم علي الوضع
كنت بروح دروسي واذاكر واضحك واهزر مع اصحابي
كنت بحاول اعمل كل حاجه عكس اللي جوايا !
كان صعب عليا اعمل كده بس كنت مضطره

في العاده مبحبش أبين ضعفي لاي شخص حتي لو كان أقرب حد ليا
بفضل اقول في كلام عكس اللي جوايا عشان بس ابين أن الفراق مش بيشغلني وان اللي راح هو اللي خسرنا وخسر طيبتنا وجدعنتنا وأخلاقنا وعمره ما هيلاقي زينا في يوم
يمكن هو كلام حقيقي وبيتحقق مستقبلًا بس وقتها مفيش اي كلام ممكن يداوي جرح لسه جديد
-انتي بقالك فتره مش عجباني في ايه بجد ؟
-مفيش حاجه صدقني انا كويسه
-لا مش مصدقك وعلي فكره انا لو في حاجه باجي احكيلك علي طول عشان احنا صحاب مالك ياتاج احكيلي
-يابني عادي والله ضغط الثانويه بس والامتحانات قربت وكده

-ربنا معاكي ويقويكي يارب متقلقيش انتي عملتي اللي عليكي وانا واثق فيكي

-يااارب
المهم طمني عليك انت ايه اخبارك
-انا بخير والله الحمد لله
-يارب دايمًا
واخبار المزه ايه
ضحك ورد:
-كويسه الحمد لله
-طب الحمد لله ياكش نلبس الفستان قريب بقي عايزه اعمل لولولولولي فرح
-قريب أن شاء الله
-ربنا يسعدكم يارب
قفلت الشات معاه وبصيت لقيت اختي قاعده جنبي وبتبصلي بضيق
-ايه مالك ؟
-انتي لسه بتتكلمي مع نوح
-ايوه عادي ازيك عامل ايه وخلاص
ردت بعصبيه:-وليه اصلا تردي عليه مش قولنا خلاص مش هنتكلم معاه تاني
-مينفعش يابنتي يقول عليا ايه

-ما يقول اللي يقوله انتي خايفه علي زعله اوي
-انا مش عايزاه يحس بحاجه يا ايه

-ما يحس ولا يولع
-ايه بالله عليكي سبيني اذاكر عشان عندي بكره امتحان
اتنهدت وهي بتبصلي بحزن وبتقولي قبل ما تخرج من الاوضه
-انتي اللي غاويه تتعبي قلبك بقي وتعشمي نفسك زياده وانتي اصلا ولا في دماغه براحتك ياتاج
قالت كلامها وخرجت من الأوضه وفي الحقيقه كان عندها حق
انا بصراحه مش فاهمه انا بعمل كده ليه ؟
ليه حتي بعد ما عرفت حقيقه اني مش في باله مكمله في الكلام
انا ليه بهدر في مشاعري علي الفاضي
طب ليه قلبي مش قادر يبعد
ليه كل ما افكر اخد قرار البعد واني مش هرد عليه تاني بماسدج واحده منه كياني يتشقلب
انا ليه كنت ضعيفه اوي كده

ليه كنت ماشيه ورا قلبي ولاغيه عقلي والمنطق وكلام اهلي وحتي اصحابي المقربين اللي حكتلهم
انا عمري ما كنت كده ابدًا
كنت اعقل واحده قبل ما احبه
بالرغم من صغر سني إلا أني كنت عاقله وبفكر في الحاجه قبل ما اعملها
ليه هو بالذات كنت بلغي عقلي ومنطقي وكل حاجه واخلي مشاعري هي اللي تتحكم فيا بالشكل المُهين ده !
اتنهدت بحزن وكملت مذاكره وانا بحاول بكل جُهدي مفكرش في الموضوع
خلصت وفتحت الواتس لقيت ماسدج منه
-ممكن اعرف مالك بجد انتي مش عجباني خالص ؟
اتنهدت بتعب ورديت بحزن:
-انا كويسه
-لا مش كويسه والمره دي هتحكيلي مالك
-صدقني يانوح موضوع مش مستاهل
-لا احكيلي بس

-والله مفيش حاجه جديده هو بس ضغط المذاكره بتاع كل يوم
المهم بس طمني عليك ايه اخبارك انت
-انا كويس الحمد لله
-يارب دائما
-انا وانتي
بلعت ريقي وانا بسأله بحزن:
-اخبار المزه ايه
كنت مراقبه الشاشه وهو بيكتب ومن جوايا بتمني اجابه واحده بس ترضيني وتدب الروح فيا
-لا خلاص مفيش مزه
ابتسمت ابتسامه واسعه وانا برد بحزن مصطنع:
-ليه بس ايه اللي حصل
-يعني عادي دماغها غير دماغي متفاهمناش
-امممممم ربنا يرزقك ببنت الحلال

-انا وانتي يارب
-يارب
-مش هتقوليلي برضو مالك ؟؟