تكملة..مش ناوي تخطب بقي يابني عايزه البس فستان..من هنا
قربت مني ومسكت ايدي وهي بتبصلي بشفقه وحزن:
-اهو ده اللي أنا كنت خايفه منه ياتاج،كنت طول الوقت بحذرك منه واقولك متعلقيش نفسك بحبال دايبه ومتتعشميش أنه ممكن يحبك
قولتلك أنه حتي لو بيحبك فعشان انتي بنت عمه وشايفك اخته الصغيره مش اكتر
عيطت وانا برد بصوت متقطع:
-ب بس ب بس هو بس هو كلامه كله كان بيدل أنه معجب بيا
أفعاله ونظراته ليا لما بيشوفني،كلامه كل يوم معايا بالساعات كل ديه كانت أشياء كفيله تخليني اتعلق واتعشم
انا معشمتش نفسي من فراغ هو السبب
هو اللي خلاني احس أن مفيش غيري في حياته،ليه عمل فيا كده،انا آذيته في ايه،ليه يعشمني لما هو مش بيحبني
تاني يوم الصبح صحيت من النوم كان عندي درس مقدرتش اروح
كنت هلكانه من كتر الوجع والعياط طول الليل
فتحت الفون لقيته باعت “صباح الخير ” كالعاده
ابتسمت بسخريه وانا بفتح الماسدج ومحتاره ارد أو لا؟؟
اصلا محتاره اعرفه انا شوفته ولا معرفهوش
وبعد تفكير كبير جدا قررت اعرفه
اخدت نفس عميق ومسحت دمعه نزلت من عيوني وانا برد علي الماسدج وقلبي بيترعش من التوتر والحزن
-صباح النور
شافها فورًا ورد عليا:
-ايه الاخبار
-تمام وانت
-الحمد لله
-مش انا شوفتك امبارح
-ايه ده بجد شوفتيني فين ؟!
رديت عليه والدموع بتلمع في عيني:
-كنت قاعد في كافيه مع بنت،انا كنت هناك اصلا بس محبتش اجي
-طب مجتيش ليه؟
رديت بهزار عشان ميحسش اني زعلانه:
-لا ياعم محبتش اكون عزول
-لا يابنتي عادي كنتي تعالي سلمي عليا
رديت عليه بأيموشن بيبص لفوق:
-المهم بس نقول يادبله الخطوبه
ضحك ورد:
-يعني لسه شويه فتره تعارف بس الاول
-امممممم عرفتوا بعض ازاي ياخبيث ياللي كل ما أسألك تقولي مش مرتبط اخس عليك بجد
-والله يابنتي مش حكايه خبث ده لسه الموضوع من يومين
هي كانت واحده زميلتي في امريكا وبعدنا فتره كبيره لما انا جيت هنا،كلمتني بقي من يومين قالتلي انها نزلت مصر وعايزه تقابلني وكده
-اه هي كويسه
-ربنا يفرحك يارب الف مبروك ياصديقي
-مبروك علي ايه يابنتي لسه
رديت بهزار وانا قلبي بيتحرق:
-لا لسه ايه انا حضرت الفستان خلاص
ضحك ورد ب الكلمه اللي بتعصبني:
-ماشي ياعم عقبالك ياصغنن
بعتله قلوب وخرجت من الشات وانا بعيط بصمت
كان احساس صعب اوي مكنتش اتمني أوصله في يوم من الايام
قابلني بوست وكأنه كان اشاره من ربنا عشان يقولي متزعليش
كان بيتكلم عن الصدف
من ضمن الجمل اللي كانت موجوده
أن مكانش صدفه انك تروح مكان معين فتشوف شخص معين وتكتشف أنه بيكذب عليك وبيخدعك !
مفيش حاجه اسمها صدفه في حياتنا،كلها اقدار،ترتيب من ربنا
“اكيد طبعا مفيش حاجه بتحصل بالصدفه كلها ترتيبات ربنا ”
اخدت نفس طويل ورديت ودمعه من عيوني بتنزل علي الشاشه
-اكيد
كنت عماله انزل في استوريهات حزينه
،اغاني،بوستات،اشعار بتوصف حالتي،كلام كتير كان كله يدل أني عرفت الحب وجربت فراقه !
-انتي كويسه؟!
كانت ماسدج منه بعتهالي بليل علي استوري كنت منزلاها
اول ما شوفتها قلبي اتنفض ورديت بحزن:
-اه
