تكملة..مش ناوي تخطب بقي يابني عايزه البس فستان..من هنا
اتنهدت تنهيده طويله وانا برد بماسدج هتشقلب كياني:
-هحكيلك عشان انا تعبانه اوي …...
الحلقة الثالثة
– حكتيله ايه انتي بتهزري؟؟
اتنهدت بحزن وانا ببص لصاحبتي وبهز راسي بنفي
-لا مش بهزر
-قولتيله ايه ؟
بصيت قدامي واحنا ماشين ومروحين من الدرس
-قولتله الموضوع بس بطريقه غير مباشره
-ازاي مش فاهمه؟!
-يعني قولتله اني كنت معجبه بواحد واني كنت مفكره أنه بيبادلني نفس الشعور بس هو طلع مرتبط
-وهو قالك ايه؟
-قالي مش يمكن هو كمان كان معجب بيكي بس شاف انك مسترجله
-مسترجله؟؟
هزيت راسي وانا ببتسم بسخريه وببص لنفسي وبقولها بتريقه
-بس انتي مش مسترجله انتي مفيش في رقتك ولا شياكتك ياتاج ازاي يقول كده بجد هو مبيشوفش!
مسحت دمعه نزلت من عيوني وانا بهز راسي بحزن:
-اللي مزعلني اني حكيت
-هو فهم أن الكلام عليه ؟
-معرفش بس اكيد فهم اي حد مكانه هيفهم
اتنهدت بحزن وهي بتمسك ايدي وبتبصلي بعتاب:
-مش عارفه اقولك ايه بس انتي غلطانه ياتاج مكانش المفروض تحكي
هزيت راسي بدموع وتأكيد:
-فعلا انا غلطانه وستين غلطانه كمان
-طب وناويه تعملي ايه؟
-ناويه ابعد
-مره واحده كده من غير اي مقدمات
-اكيد لا مش حابه أثبت اني كنت بحكي عنه هو لو بعدت هيفهم وش
-ادعيلي انتي بس
-ربنا يريح قلبك وبالك ويعوضك خير يارب
-يااارب
روحت البيت اليوم ده وانا مقرره افوق لمذاكرتي واحاول انسي الموضوع وخصوصًا أن بدأ مستوايا يقل والمدرسين يشتكوا مني بعد ما كنت شاطره في اول السنه وبطلع من الاوائل !
اتنهدت تنهيده طويله وانا بسند ايدي علي سور البلكونه وبشرب بوق من فنجان القهوه اللي عملته عشان يساعدني على التفكير
بدأت وقتها افكر بعقلي شويه
لو كنت أطول اشيل قلبي عشان اقدر افكر كنت هعمل كده
حاولت انهي الصراع اللي قايم بين عضوين كل واحد فيهم بيفكر عكس التاني تمامًا
كانت فتره صعبه حاولت فيها ابعد بكل الطرق وفي الحقيقه هو ساعدني علي كده من بعد ما بقي يختفي ويفضل بالايام ميكلمنيش
وقتها بس قدرت اعرف أن مشاعري وصلت حتي لو بطريقه غير مباشره لكنها في النهايه وصلت وبكل أسف بُعده يدل انها اترفضت
مكنتش زعلانه علي رفضه لمشاعري أو استهوانه بيها قد ما كنت زعلانه علي نفسي وعلي وقت كبير جدا ضيعته مع شخص ميستاهلش قلبي ولا حبي
كنت لسه صغيره في فتره المراهقه ومتخبطه ومشاعري هي اللي موجهاني
لكن التجارب والايام والدقائق أو حتي الثواني اللي بتمر علينا بتعلم الواحد وتخليه ينضج ويكبر عمر فوق عمره
فات شهر كامل حاولت بكل ما املك ادوس علي قلبي وابعد
البعد عن الطريق الغلط كان انسب حل
حل ينقذ قلبي،مشاعري،كرامتي ونفسي
منكرش اني كل فتره كنت بدخل أكلمه وهو كذلك
منكرش أبدًا أن كان لسه في بصيص أمل جوايا وخاصه من بعد ما عرفت أنه مبقاش مرتبط
كنت ما بين نارين القرب أو البعد
مكنتش عارفه اخد قرار يرضي قلبي وعقلي
قلبي عايز قربه
عقلي رافض بكل ما يملك !
وكأن عمرو حسن بيوصفي في جمله من أشعاره
فيه نُص بتاع ” نغز كرامتك ” مابقاش طايقه
أما النص اللي بتاع ” قلبك ” فـ ده لسه معاه
عدت فتره الامتحانات علي خير
وفي الحقيقه انا في الفتره الاخيره مكنتش بنام من كتر التوتر والخوف
كنت بذاكر وبجتهد وبحاول اشيل الموضوع من دماغي
كان كل يوم يدخل يسألني عملتي ايه وكنت برد علي قد الكلمه واقفل
لحد ما فضلت بالايام متكلمش وهو كمان وديه كانت اكتر خطوه صح عملتها في حياتي
ظهرت النتيجه ونجحت بتقدير كويس وقدمت علي كليه تجاره ودخلتها
-ياااااه أخيرًا بقي دخلت الكليه وهخربها
اختي بتريقه:
-اوماااااال
-لا لا احباط مبحبش
-بصي ياحبي انا هسيبك تتفاجئ هتنبهري في الكليه صدقيني
-مش عارفه ليه خوفت بس ولو ولوووو لو مسحوا بيا بلاط المدرج مش هحن لايام الثانويه الهباب دي تاني
-هتنبهري
