زواج باطل كاتبة إيمان شلبي
- الو - ريمان اخرجي رديت باستغراب : - اخرج فين !
رد بهدوء : - باباكي ومامتك فاقدين الوعي برا وقبل أي اعتراض انا اسف بس مكانش قدامي حل غير كده عشان اساعدك تهربي ويالا بسرعه قبل ما يصحوا
- تمام تمام انا خارجه
كنت راكبه في العربيه جنب " مؤيد" وانا ببص من الازاز علي الشوارع في دماغي الف حاجه والف سؤال في دماغي الف سيناريو كلهم ابشع من بعض مفيش واحد فيهم منصف لغلطتي ابدا !!
في الحقيقه انا كنت عارفه أن اللي بعمله غلط واكبر غلط كمان كنت عارفه اني ميصحش ابدا اخاطر بحياتي وسمعتي وسمعه اهلي كنت عارفه أن آخره الغلط غلط ،
عارفه أن اكيد مؤيد مش كويس لانه لو كويس عمره ما كان يعرض عليا عرض زي ده عمره ما كان يقلل مني ولا من احترامي لكن في كل الأحوال انا متضرره فمبقاش فارق معايا اللي يحصل
جوازي من مؤيد بالنسبالي كان اهون عليا من جوازي من جوز اختي اللي كنت هشوفها في كل ركن هسمع صوتها في كل وقت هحس بزعلها من خيانتي مع انها ماتت وبدر هيبقي جوزي زي زيها بالظبط لكن صعب
غمضت عيني مع نسمه الهواء الخفيفه اللي كانت بتخبط في وشي برقه وكأنها بتطبطب عليا من قساوه الدنيا واختارتها الغير منصفه ليا ابدا
نزلت دموعي بهدوء وانا بتخيل حال ماما وبابا لما يفوقوا وميلاقونيش بتخيل حالهم وهما عازمين كل الناس علي كتب كتابي وفي الآخر يتقال العروسه هربت مع عشيقها
فوقت من شرودي علي صوت مؤيد اللي حط أيده علي ايدي وبصلي وهو بيقول برقه: - متقلقيش
بصيتله وهزيت راسي وانا ببتسم بتوتر
كمل الطريق وكل واحد فينا ساكت لحد ما وقف في مكان شبه مقطوع ودخل بينا في شارع ضيق وبعد دقايق وقف قدام عماره كان شكلها قديم اوي ونزل وانا قاعده ببص حوليا بخو.ف
مش عارفه ليه خوفت بالشكل ده ؟! مع أن المكان في ناس كتير بس حسيت بقلبي بيتنفض بخو.ف
فتحلي مؤيد العربيه وهو بيشاولي انزل بهدوء : - اتفضلي
